‘ຕົ້ນໄມ້ບັນດານໃຈ’ ແມ່ນສ່ວນໜຶ່ງຂອງກິດຈະກຳໃນງານນິທັດສະການຂອງອົງການປາແດກ (a Special Anniversary and Fair) ເມື່ອວັນທີ 15 ທັນວາ 2013 ເພື່ອເປັນການສະເຫຼີມສະຫຼອງຜົນງານການເຮັດວຽກຂອງອົງການປາແດກ ແລະ ເພື່ອເປັນການລຳລຶກເຖິງຜູ້ກໍ່ຕັ້ງອົງການປາແດກ, ທ່ານ ສົມບັດ ສົມພອນ. ຄຳເຫັນຕ່າງໆ ໄດ້ຖືກຮີບໂຮບຈາກງານທີ່ຄ້າຍຄືກັນໃນປີຕໍ່ມາ. ຂໍ້ຄວາມລຸ່ມນີ້ແມ່ນຖືກຄັດເລືອກມາຈາກຂໍ້ຄວາມຕ່າງໆ
2015, 16 & 17 (Remarks not shared)
2014
Outhit
ສິ່ງທີ່ທ່ານສົມບັດທຸ່ມເທລົງໄປນັ້ນກຳໄລຂອງທ່ານບໍ່ແມ່ນເງີນແຕ່ແມ່ນໃຫ້ປະຊາຊົນມີວຽກເຮັດງານທຳມີຢູ່ມີກິນມີທຸລະກິດເປັນຂອງຕົນເອງສິ່ງທີ່ເພິ່ນສິດສອນໃຫ້ ສິ່ງທີ່ເຮົາຮູ້ເຮົາກໍຢາກສອນຄົນຟຼີເພື່ອມີຄົນສືບຕໍ່ ເປັນສີມືກຸ້ມຕົນເອງຫຼືວ່າລ້ຽງຊີບໄດ້.
——————–
Khanthavixai
ມັກການອະນຸລັກແບບເພິ່ນເຮັດເພື່ອສ່ວນລວມບໍ່ໄດ້ເຮັດ ເພື່ອຕົນເອງຄົນແບບນີ້ເຂົາ ເອີ້ນວ່າຄົນເສຍສະຫຼະເພື່ອອານາຄົດລູກຫຼານ.
——————–
La De
ຄິດຮອດລຸງສົມບັດສົມພອນຫຼາຍໆ ຂໍໃຫ້ສິ່ງສັກສິດທັງຫຼາຍໃນສາກົນໂລກປົກປ້ອງຄຸ້ມຄອງ ໃຫ້ປອດໄພແລະຂໍໃຫ້ເພີ່ນກັບມາໄວໆ ເພາະລຸງຄືນັກພັດທະນາຕົ້ນແບບຂອງປະເທດ.
——————–
Souk Saiseng
ຂອບໃຈລຸງສົມບັດຫຼາຍໆ ທີ່ອຸທິດຊີວິດເພື່ອຜົນປະໂຫຍດສູງສຸດຂອງປະເທດ ກໍຄືປະຊາຊົນທຸກຄົນຂອບໃຈຫຼາຍໆ ຈະຈົດຈຳລຸງສົມບັດໄວ້ໃນໃຈຕະຫຼອດໄປ.
2013
ບໍ່ໄດ້ລະບຸຊື່
ອ້າຍສົມບັດເປັນຜູ້ໜຶ່ງທີ່ເປັນຕົວແບບໃນວຽກງານດ້ານ ພັດທະນາ. ທ່ານໄດ້ທຸ້ມເຫື່ອເທແຮງເພື່ອຢາກໃຫ້ລາວ ພັດທະນາຢ່າງມີຄວາມຍືນຍົງ ທ່ານໄດ້ສ້າງ legacy ໄວ້ສຳລັບໄວໜຸ່ມ.
——————–
ບໍ່ໄດ້ລະບຸຊື
ສະບາຍດີ! ດີໃຈຫຼາຍ ທີ່ໄດ້ມາຮ່ວມງານນີ້ ! ເຮັດໃຫ້ນ້ອງຄິດເຫັນຄົນດີທີ່ໜ້າຍົກຍ້ອງ ແລະ ຄວນເອົາໄປເປັນຕົວຢ່າງໃນການປະຕິບັດ. ເຮັດໃຫ້ຕົວນ້ອງໄດ້ຮູ້ຫຍັງຫຼາຍໆຢ່າງຈາກບຸກຄົນທີ່ເປັນຕົ້ນແບບຄືລຸງສົມບັດ. ນ້ອງຈະຂໍເປັນຄົນໜຶ່ງທີ່ເຮັດໜ້າທີ່ໃນການພັດທະນາ ແລະ ຊ່ວຍເຫຼືອເພື່ອນມະນຸດດ້ວຍກັນຈົນສຸດຄວາມສາມາດ. ດ້ວຍຄວາມເຄົາລົບຮັກ
——————–
ບໍ່ໄດ້ລະບຸຊື່
ຂ້າພະເຈົ້າເຫັນວ່າແນວຄິດການພັດທະນາປະສົມປະສານກັນລະຫວ່າງເສດຖະກິດ ແລະ ສັງຄົມໂດຍຄຳນຶງເຖິງສະພາບແວດລ້ອມແມ່ນເໝາະສົມກັບການພັດທະນາຢູ່ ລາວ ລາວເປັນຜູ້ທີ່ມີແນວຄິດທີ່ເຫັນກວ້າງໄກ ເບິ່ງໄປຂ້າງໜ້າຢ່າງມີຄວາມຫວັງສຳລັບປະເທດລາວ
——————–
ບໍ່ໄດ້ລະບຸຊື່
ຂ້ອຍມີຄວາມມຸ້ງໝັ້ນຢາກເຮັດວຽກພັດທະນາມາແຕ່ດົນ. ເພາະຕອນເປັນໄວເດັກບໍ່ມີໂອກາດໄດ້ຮັບສິ່ງເຫຼົ່ານີ້. ຈົນປີ 2000 ໄດ້ມາພົບກັບຄວາມຝັນ ຂອງຕົນ. ສົນໃຈຕໍ່ວິໄສທັດ ຂອງລຸງບັດ ຕັດສິນໃຈອອກຈາກວຽກລັດ ຫຼືວຽກທີ່ມີລາຍຮັບ ຫຼາຍ (ຕອນນັ້ນ) ມາເຮັດວຽກ ພັດທະນາ. ຈະສູ້ຕໍ່ໄປ
——————–
ຮິໂບ (Hible)
ຄັ້ງທຳອິດທີ່ຂ້ອຍພົບກັບສົມບັດ, ຂ້ອຍຫຼົງໄຫຼໃນຄວາມສະຫຼຽວສະຫຼາດ ແລະ ວິໄສທັດຂອງລາວທີ່ຢາກໃຫ້ການພັດທະນາໃນປະເທດລາວດີຂື້ນ. ມັ້ນເປັນຄັ້ງທຳອິດທີ່ຂ້ອຍໄດ້ພົບກັບຄົນລາວທີ່ມີມຸມມອງກວ້າງໄກກ້າວໜ້າ…
ຂໍຢ່າໄດ້ຍອມແພ້!
——————–
ບໍ່ໄດ້ລະບຸຊື່
ຄວາມຮູ້ສຶກທີ່ມາໃນມື້ນີ້ ໃນງານວັນຄົບຮອບປາແດກ ດີໃຈຫຼາຍ ທີ່ໄດ້ເຂົ້າຮ່ວມໃນງານອັນສຳຄັນ ເພາະຕົວນ້ອງ ກໍມັກໃນກິດຈະກຳ ແລະ ສິ່ງທີ່ລຸງສົມບັດ ສົມພອນ ເພາະເພິ່ນໄດ້ເສຍສະຫຼະເຫື່ອແຮງ ໃນວຽກງານການພັດທະນາ ໄວໜຸ່ມ. ທ່ານເປັນ ແຮງບັນດານໃຈໃຫ້ນ້ອງມີຄວາມກ້າທີ່ຈະຝັນ ໃນການຮຽນຮູ້ ແລະ ພັດທະນາຕົນເອງ ໃຫ້ດີຂື້ນ (ຂໍຂອບໃຈ)
——————–
ລິຊາ ໂນເລນ (Lisa Nowlain)
ສຳລັບຂ້ອຍ ສົມບັດ ໝາຍເຖິງຄວາມຫວັງ ແລະ ຜູ້ກະຕຸກຊຸກຍູ້ຊຸມຊົນໃນປະເທດລາວ. ທ່າແຮງຂອງລາວແມ່ນການສ້າງຄວາມເຂັ້ມແຂັງໃຫ້ກັບຄົນລາວ ດ້ວຍຮູບແບບສັນຕິວິທີ ແລະ ດ້ວຍຄວາມຮັກ ເພື່ອວ່າພວກເຂົາຈະມີອິດສະລະພາບໃນການສ້າງອະນາຄົດຂອງຕົນເອງ. ລາວເຮັດວຽກກັບທີມງານໃນທົ່ວທຸກມຸມໂລກ ແລະ ຈິດໃຈຂອງລາວເປັນຂອງຄົນລາວແຕ່ໃດມາ.
——————–
ຈັນທະລັງສີ
ປາແດກກັບລຸງບັດ ແມ່ນອັນດຽວກັນ ມັນແມ່ນສິ່ງທີ່ແຍກອອກຈາກກັນບໍ່ໄດ້ ຖ້າປາແດກຍັງຢູ່ ລຸງກໍຍັງຢູ່ນຳພວກເຮົາຕະຫຼອດ. ແຮງບັນດານໃຈອັນຍິ່ງໃຫຍ່ໃນການເຮັດວຽກພັດທະນາແມ່ນຂ້ອຍໄດ້ມາຈາກລຸງສົມບັດ ແລະ ປາແດກ ຂໍເປັນກຳລັງໃຈໃຫ້ກັບພະນັກງານທຸກຄົນໃນປາແດກ ແລະ ຕົນເອງໃຫ້ສືບຕໍ່ວຽກຂອງລຸງ.
——————–
ທອງແດງ (Thongdeng)
ເຈົ້າແມ່ນແຮງບັນດານໃຈຂອງພວກເຮົາ, ຄວາມຫວັງ ແລະ ຕົວແບບໃນດ້ານການພັດທະນາຊຸມຊົນ ແລະ ການສ້າງຄວາມອາດສາມາດໃຫ້ແກ່ໄວໜຸ່ມໃນປະເທດລາວ. ພວກເຂົາອະທິຖານໃຫ້ເຈົ້າໄດ້ກັບມາຢ່າງປອດໄພ.
——————–
ບໍ່ໄດ້ລະບຸຊື່
ຕອນທີ່ຂ້ອຍກໍາລັງຊອກຫາຄຸນຄ່າຂອງຊີວິດ ແລະ ຂ້ອຍກໍໄດ້ພົບໃນວີດີໂອສອງສົມບັດ YouTube clip on Education.ຫຼັງຈາກນັ້ນຂ້ອຍກໍໄດ້ອຸທິດທັກສະ ແລະ ຄຸນຄ່າຂອງຂ້ອຍໃນການຊ່ວຍເຫຼືອປະເທດລາວແຕ່ນັ້ນເປັນຕົ້ນມາ.
——————–
ຫຼ້າ ນວນດຳ ກົມມານະ (Lar Nouandam Kommana)
ຂ້ອຍເຄີຍເປັນອາສາສະໝັກໃນໂຄງການພະພັດທະນາ ແລະກໍເຄີຍເຮັດວຽກັບລຸງສົມບັດ. ແຕ່ໃດມາ ຂ້ອຍມີຄວາມເຄົາລົບນັບຖືລາວເປັນດັ່ງອາຈານຂອງຂ້ອຍ. ຕັ້ງແຕ່ມື້ທີ່ລາວຫາຍຕົວໄປຂ້ອຍໄດ້ຕິດຕາມຂ່າວກ່ຽວກັບລາວທຸກມື້ ແລະ ພະຍາຍາມແຊຣຂໍ້ມູນ. ຕອນນີ້ຂ້ອຍໄດ້ຮັບທຸກໆ ຂໍ້ມູນອັບເດດຈາກເວັບໄຊທ. ຂ້ອຍຢາກຮູ້ວ່າຂ້ອຍຈະເຮັດຫຍັງໄດ້ແດ່ ເພື່ອເປັນການຊ່ວຍເຫຼືອເພີ້ມຕື່ມ. ຂ້ອຍຈະບໍ່ຍອມແພ້ ຈະລໍຖ້າລາວ ລໍຖ້າການກັບມາຢ່າງປອດໄພຂອງລາວ.
ຂໍເປັນກຳລັງໃຈໃຫ້ທຸກຄົນທີ່ອຸທິດຕົນເພື່ອຊອກຫາລຸງສົມບັດ!
——————–
ວົງສຳພັນ
ຂໍສິ່ງສັກສິດທັງຫຼາຍ ທັງປວງຈົ່ງເມດຕາ ແລະ ດົນບັນດານໃຫ້ທ່ານສົມບັດພ້ອມດ້ວຍຄອບຄົວ ທີມງານຈົ່ງມີແຕ່ຄວາມສຸກຈະເລີນຈົ່ງໃຫ້ຜົນດີຜົນດີ ເດັ່ນຂອງທ່ານຈົ່ງຈະເລີນ ແລະ ໝັ້ນຄົງຕະຫຼອດໄປ. ຂໍທ່ານຈົ່ງພົ້ນຈາກ ຄວາມທຸກລຳບາກທັງຫຼາຍ. ຂໍທ່ານຈົ່ງມີຊີວິດທີ່ດີ, ມີພາກພູມທີ່ດີ, ຫຼຸດພົ້ນຈາກວິບາກກຳຄັ້ງນີ້ດ້ວຍເຖິດ!!!
ວົງສຳພັນ. ຜູ້ອຳນວຍການໂຮງຮຽນ ປະຖົມຫ້ວຍຫົງ
——————–
ບໍ່ລະບຸຊື່
ລຸງບັດ! ເຖິງວ່າລຸງຈະຢູ່ແຫ່ງໃດກໍຕາມແຕ່ພວກລູກຫຼານຢູ່ທາງພີ້ຈະສານຕໍ່ອຸດົມການພັດທະນາຄົນຮຸ່ນໃໝ່ ໃຫ້ເປັນຄົນດີບໍ່ເຫັນແກ່ຕົວ. ຄິດເຖິງລຸງ! ຂໍໃຫ້ລຸງຈົ່ງກັບມາໄວໆ ແລະ ມີສຸຂະພາບແຂັງແຮງ. ຫຼານຂອງລຸງ
——————–
ບໍ່ລະບຸຊື່
ຂ້າພະເຈົ້າເຫັນວ່າແນວຄິດການພັດທະນາປະສົມປະສານກັນລະຫວ່າງເສດຖະກິດ ແລະ ສັງຄົມໂດຍຄຳນຶງເຖິງສະພາບແວດລ້ອມແມ່ນເໝາະສົມກັບການພັດທະນາຢູ່ລາວ ລາວເປັນຜູ້ທີ່ມີແນວຄິດທີ່ເຫັນກວ້າງໄກ ເບິ່ງໄປ ຂ້າງໜ້າຢ່າງມີຄວາມຫວັງສຳລັບປະເທດລາວ.
——————–
ທະນົງສີ
ສົມບັດ, ອຳມະຕະສຳລັບຜູ້ຮັກຄວາມກ້າວໜ້າ ອຸທິດຕົນເພື່ອການພັດທະນາ.’ການສຶກສາ ແບບຊຸມຊົນເປັນກະແຈແຫ່ງ ຄວາມສຳເລັດ ທີ່ໄດ້ຢັ້ງຢືນຈາກຜົນງານ.’ ເຈົ້າໄດ້ສຶກສາໃຫ້ ຄົນລາວ ຮູ້ຈັກຈຳແນກຄຸນນະພາບ ແລະ ປະລິມານ.
——————–
ສເຕຟານ (Stefan)
ໜຶ່ງປີ… ແຮງບັນດານໃຈທີ່ໄດ້ຈາກຄົນທີ່ມີຄວາມສະຫຼາດຫຼັກແຫຼມດັ່ງເຊັ່ນສົມບັດ ເຊິ່ງເປັນຄົນທີ່ຖ່ອມໂຕ, ຕະໜັກເຖິງສິ່ງໃດສຳຄັນ ແລະ ສິ່ງໃດທີ່ບໍ່ສຳຄັນ. ໃຜກໍຕາມທີ່ເປັນຄົນເອົາລາວໄປແມ່ນໄດ້ເຮັດໃນສິ່ງທີ່ເປັນຄວາມຜິດພາດທີ່ໃຫຍ່ຫຼວງ. ພວກເຂົາອາດຈະຄິດວ່າພວກເຂົາສາມາດຢຸດແນວຄວາມຄິດດ້ວຍນ້ຳມືຂອງພວກເຂົາ. ແຕ່ວ່າ ເຮັດບໍ່ໄດ້ດອກ ສົມບົດ ຍັງມີຊີວິດຢູ່.
——————–
ຫວາ (Vah)
ເຖິງອ້າຍ ສົມບັດ :
ເຈົ້າເປັນອ້າຍທີ່ຈິດໃຈດີ ແລະ ມີຄວາມເມດຕາສຳລັບຂ້ອຍ. ຂ້ອຍໄດ້ຮັບແຮງບັນດານໃຈຈາກເຈົ້າມາຕະຫຼອດ ຈາກການທີ່ເຈົ້າຍຶດໝັ້ນ ທຸ້ມເທເຫື່ອແຮງ ແລະ ຜັນຂະຫຍາຍປະສົບການໃນການພັດທະນາຄົນຮຸ່ນໃໝ່ ແລະ ການພັດທະນາໄວໜຸ່ມໄປໃນທາງທີ່ດີ ໃນ ສປປ ລາວ ແລະກໍລວມທັງປະເທດອື່ນໆ ໃນໂລກເພື່ອຊ່ວຍໃຫ້ຄົນຮຸ່ນໃໝ່ໄດ້ພັດທະນາຄວາມໝັ້ນໃຈໃນໂຕເອງ ແລະ ໃຊ້ເວລາກັບກິດຈະກຳທີ່ເປັນປະໂຫຍດ ແລະ ມີຄຸນຄ່າ ແລະ ຍັງໄດ້ກະກຽມພວກເຂົາໃຫ້ມີຈິດອາສາຕັ້ງແຕ່ດຽວນີ້ ແລະ ໃນຖານະເປັນພົນລະເມືອງທີ່ມີຄວາມຕື່ນຕົວສຳລັບອະນາຄົດ. ຄຸນງາມຄວາມດີຂອງເຈົ້າຈະຄຸ້ມຄອງ ແລະ ຈະປົກປ້ອງເຈົ້າບໍ່ວ່າເຈົ້າຈະຢູ່ແຫ່ງຫົນໃດ.
ຂ້ອຍຢູ່ຄຽງຂ້າງເຈົ້າສະເໝີ ອ້າຍສົມບັດ ແລະ ຊຸຍມິງ
——————–
ເອັມມາ ຈີເຊັນ, ນິວຊີແລນ (Emma Giesen, New Zealand)
ຂ້ອຍເຮັດວຽກກັບສົມບັດ 2 ປີ ແລະ ຕະຫຼອດເວລາຕອນນັ້ນຂ້ອຍເຫັນວ່າລາວອຸດທິດເຫື່ອແຮງທັງໝົດຂອງຕົນເອງໄປກັບການພັດທະນາໄວໜຸ່ມໃຫ້ມີການປ່ຽນແປງທີ່ດີຂື້ນ. ລາວບໍ່ເຄີຍວິພາກວິຈານ ຫຼື ພະຍາຍາມຂັດຂວາງບໍ່ໃຫ້ສິ່ງໃດສິ່ງໜຶ່ງເກີດຂື້ນ ແຕ່ຫາກໄດ້ພະຍາຍາມໃຫ້ເກີດມີການປ່ຽນແປງທີ່ດີຂື້ນ ເຊິ່ງແນ່ນອນລາວເປັນທີ່ປຶກສາ ແລະ ທັງເປັນແຮງບັນດານໃຈສຳລັບຂ້ອຍ.
ລາວມີແນວຄວາມຄິດຫຼາຍຢ່າງກ່ຽວກັບໂຄງການຕ່າງໆ ເຊິ່ງມີຄວາມເປັນເອກະລັກ ແລະ ມີຮາກຝັງເລິກໃນວັດທະນະທຳຂອງປະເທດລາວ ແລະ ໂຄງການຂອງລາວລ້ວນແລ້ວແຕ່ມີຄວາມທັນສະໄໝລ້ຳໜ້າ ບໍ່ພຽງແຕ່ກັບປະເທດລາວ ແຕ່ລວມທັງການພັດທະນາໃນບໍລິບົດສາກົນ. ຂ້ອຍມັກປະຫຼາດໃຈກັບຄວາມຈິງທີ່ວ່າລາວມີຫຼາກຫຼາຍໆ ຄວາມຄິດທີ່ຈະຊ່ວຍເພື່ອນຮ່ວມຊາດຂອງລາວ, ລາວບໍ່ໄດ້ເວົ້າຢ່າງດຽວກ່ຽວກັບສິ່ງຕ່າງໆ ແຕ່ລາວລົງມືເຮັດໄປນຳ-ມີການດຳເນີນການຫຼາຍໆໂຄງການທີ່ແຕກຕ່າງກັນໄປພ້ອມໆກັນ.
ຄວາມມຸ່ງມານະຂອງສົມບັດທີ່ມີຕໍ່ຄົນລາວ ແລະ ການທຸ້ມເຫື່ອເທແຮງຂອງລາວໃນການລົງມືປະຕິບັດຕົວຈິງເພື່ອເສີມສ້າງຊີວິດຜູ້ຄົນໃຫ້ດີຂື້ນນັ້ນ ລ້ວນແຕ່ເປັນແຮງບັນດານໃຈ. ລາວເປັນຄົນທີ່ເປັນແຮງຈູງໃຈໃຫ້ຂ້ອຍໃນໄລຍະທຳອິດຂອງການເຮັດວຽກພັດທະນາ ແລະ ຂ້ອຍກໍພຽງແຕ່ໄດ້ຫວັງວ່າຈະສາມາດສານຕໍ່ແບບຢ່າງທີ່ເຈົ້າເຄີຍສ້າງໄວ້ໃຫ້ເຫັນເຫຼົ່ານັ້ນ.
ກະລຸນາສົ່ງຕໍ່ຄວາມຮັກແພງສຸດໃຈຈາກຂ້ອຍໄປເຖິງລາວ ແລະ ຄວາມເຄົາລົບນັບຖືເພື່ອໃຫ້ລາວໄດ້ກັບຄືນມາ. ມັນເປັນເລື່ອງບໍ່ໜ້າເຊື່ອທີ່ບຸກຄົນໃດໜຶ່ງ ທີ່ມີຈິດໃຈອ່ອນໂຍນ ເປັນຊັບສົມບັດຂອງຄົນລາວ ຈະຖືກລັກພາຕົວ
ດ້ວຍຄວາມຫວັງສູງສຸດເພື່ອໃຫ້ລາວໄດ້ກັບມາຢ່າງປອດໄພ.
——————–
ເດວິດ,ໂລຍສ, ຮານາ, ແມັກ, ແລະ ເອັມມາ ຈາກ ມິນິໂຊຕາ (David, Lois, Hannah, Max & Emma of Minnesota)
ບົດຮຽນລໍ້າຄ່າທີ່ສົມບັດໄດ້ມອບໄວ້ໃຫ້ແກ່ພວກເຮົາ:
- ສະຕິປັນຍາໃນການຮູ້ຈັກວ່າມີຫຍັງທີ່ຕ້ອງເຮັດ ແລະ ຕ້ອງເຮັດຕອນໃດຈຶ່ງຈະເໝາະສົມ
- ກ້າທີ່ຈະເຮັດໃນສິ່ງທີ່ຖືກຕ້ອງເຖິງວ່າມັນຈະເປັນເລື່ອງທ້າທາຍ
- ການມີວິໄສທັດກວ້າງໄກເໜືອສິ່ງທີ່ເປັນຢູ່ໃນປັດຈຸບັນ
- ການອຸທິດຕົນເພື່ອຄວາມຝັນ ແລະ ເພື່ອກະຕຸກຊຸກຍູ້ຄົນອື່ນໃຫ້ຝັນໄປນຳກັນກັບເຈົ້າ
- ການເຊື່ອມປະສານຈິດວິນຍານທີ່ເປັນການສົ່ງເສີມການຮ່ວມໄມ້ຮ່ວມມື ແລະ ການຮັບປະກັນຄວາມຍືນຍົງ
- ຄວາມເອື້ອເຟື້ອເຜື່ອແຜ່ຢ່າງບໍ່ທໍ້ຖອຍຂອງເຈົ້າໃນການເຮັດໃນໜ້າທີ່ທີ່ເປັນບູລິມະສິດສຳຄັນ
- ມີຄວາມເຫັນອົກເຫັນໃຈ ຮັບຮູ້ເຖິງຄວາມຕ້ອງການຂອງຄົນອື່ນ ແລະ ຕອບສະໜອງຄວາມຕ້ອງການນັ້ນໆ ໃນທາງທີ່ຈະຊ່ວຍໃຫ້ພວກເຂົາໄດ້ຮຽນຮູ້ການປັບປຸງຊີວິດໃຫ້ດີຂື້ນກວ່າເກົ່າ.
- ກ່ອນຈະຮຽກຮ້ອງຄວາມເປັນທຳຈາກຄົນອື່ນຕົວເຮົາເອງຕ້ອງເປັນທຳກ່ອນ
- ມີຄວາມອ່ອນນ້ອມຖ່ອມຕົນ ເປີດໃຈຮຽນຮູ້ຈາກຄົນອື່ນບໍ່ວ່າພວກເຂົາຈະຢືນຢູ່ຈຸດໃດຂອງຊີວິດກໍຕາມ
- ເປັນຜູ້ນຳເພື່ອປູເສັ້ນທາງໃຫ້ກັບຄົນອື່ນໃຫ້ສາມາດຍ່າງຕາມຫຼັງໄດ້ ແລະ ໃນທີ່ສຸດໃຫ້ພວກເຂົາສາມາດຍ່າງອອກໄປຂ້າງທາງເພື່ອຍ່າງຕາມເສັ້ນທາງຂອງຕົນເອງໄດ້.
- ຍຶດຖືເລື່ອງຈິດວິນຍານເປັນຫຼັກ ເພື່ອສອນພວກເຮົາໃຫ້ຮູ້ຈັກການຢູ່ກັບປັດຈຸບັນ ແລະ ເຕືອນສະຕິເຮົາວ່າຕອນນີ້ເຮົາຢືນຢູ່ຈຸດໃດຂອງຄວາມສຳພັນກັບຄົນອື່ນ.
- ມິດຕະພາບທີ່ຢູ່ເໜືອການເວລາ ແລະ ຍືນຍົງຄົງຕົວບໍ່ວ່າຈະຢູ່ຫ່າງໄກກັນປານໃດກໍຕາມ
ສົມບັດ, ພວກເຮົາຮັກ ແລະ ຄິດຮອດເຈົ້າ
——————–
ບໍ່ລະບຸຊື່
ທຳອິດຂ້ອຍໄດ້ພົບກັບກຸ່ມໄວໜຸ່ມຄົນລາວທີ່ໜ້າປະທັບໃຈ ແລະ ເມື່ອຂ້ອຍຖາມກ່ຽວກັບປະຫວັດຂອງພວກເຂົາ, ພວກເຂົາລ້ວນແຕ່ເລົ່າກ່ຽວກັບອົງການປາແດກ. ຫຼັງຈາກນັ້ນຂ້ອຍກໍໄດ້ພົບກັບບຸກຄົນຜູ້ທີ່ເປັນແຮງບັນດານໃຈ ແລະ ເປັນບຸກຄົນແບບຢ່າງ ກໍຄື ສົມບັດ. ຂ້ອຍເຫັນໄດ້ວ່າລາວເຮັດວຽກສົ່ງເສີມເພື່ອໃຫ້ໂລກມີຄວາມເປັນທຳ ແລະ ມີຄວາມຍືນຍົງໄດ້ແນວໃດ, ແລະ ວິໄສທັດຂອງລາວກ່ຽວກັບຄົນຮຸ່ນໃໝ່ໃຫ້ກາຍເປັນຜູ້ສືບທອດຕໍ່ໄປ ໄດ້ສ້າງໃຫ້ເກີດແຮງບັນດານໃຈໃຫ້ກັບຜູ້ຄົນຈຳນວນຫຼາຍ, ລວມທັງຂ້ອຍນຳ. ລາວໄດ້ສ້າງແຮງບັນດານໃຈໃນຫຼາຍດ້ານ ແລະ ທຸກຄົນລ້ວນແຕ່ສົ່ງຕໍ່ແຮງບັນດານໃຈໃຫ້ກັບຄົນອື່ນໆ. ຜູ້ຄົນເຫຼົ່ານີ້ ແຮງບັນດານໃຈເຫຼົ່ານີ້ ຈະຂະຫຍາຍແຜ່ອອກໄປກວ້າງຂື້ນຈົນໃນທີ່ເກີດການປ່ຽນແປງທີ່ສຳຄັນ ແລະ ຜັນຂະຫຍາຍຕໍ່ໄປ. ສຳລັບເຈົ້າທຸກຄົນໃນອົງການປາແດກ: ກະລຸນາສືບຕໍ່ສ້າງແຮງບັນດານໃຈໃຫ້ກັບຄົນອື່ນໆ ຕໍ່ໄປເພື່ອໃຫ້ສົມບັດຍັງຄົງຢູ່!
——————–
ຄຣິສຕິນາ ແມັກມິລອນ, ອັງກິດ (Christina McMellon, England)
ຂ້ອຍເຄີຍໄປຢູ່ປະເທດລາວແຕ່ເດືອນກັນຍາ 2010 ເຖິງ ເດືອນກັນຍາ ປີ 2012 ເພື່ອເຮັດງານວິໄຈກ່ຽວກັບຄວາມສຸກ ແລະ ໃນໄລຍະປີ 2012 ໄດ້ເຮັດວຽກໃກ້ຊິດກັບສົມບັດ ສົມພອນ. ທຸກໆ ຄັ້ງທີ່ໄດ້ພົບກັບສົມບັດ,ຂ້ອຍມັກຈະກັບມາແບບມືນໆໃນສະໝອງທີ່ເຕັມໄປດ້ວຍແນວຄວາມຄິດ ແລະ ການເຊື່ອມໂຍງ ແລະ ພະລັງ ແລະ ຄວາມເປັນໄປໄດ້ທີ່ຈະນຳຄວາມຄິດລົງສູ່ການປະຕິບັດຕົວຈິງ ຂ້ອຍຮູ້ສຶກພາກພູມໃຈທີ່ມີໂອກາດໄດ້ສົນທະນາໂອ້ລົມກັບລາວໃນຫຼາກຫຼາຍປະເດັນ ເຊິ່ງກໍລວມທັງທີ່ກຽວຂ້ອງກັບບົດວິໄຈ ແລະ ການປະຈົນໄພຂອງຂ້ອຍທີ່ນຳໄປສູ່ການຄົ້ນຫາເພີ້ມຕື່ມກ່ຽວໃນເລື່ອງສະມາທິ ແລະ ສາດສະໜາພຸດ. ພວກເຮົ
າບໍ່ໄດ້ເຫັນດີເຫັນພ້ອມກັນໃນທຸກໆເລື່ອງໃນລາຍລະອຽດ ແຕ່ແນ່ນອນ ມັນເປັນການສົນທະນາທີ່ມີຄວາມເຂັ້ມຂົ້ນ, ມີສີສັນ, ແລະ ມີຄວາມກະຕືລືລົ້ນ. ສະເພາະເຈາະຈົງແລ້ວ ຂ້ອຍໄດ້ຮັບແຮງບັນດານໃຈຈາກລາວໃນເລື່ອງການອຸທິດຕົນເພື່ອປະເທດລາວ ແລະ ຄົນລາວ, ແລະ ການເຮັດວຽກເພື່ອປະສານການຮ່ວມມືກັບຊຸມຊົນໃນລາວ ເພື່ອຄົ້ນຫາແນວທາງການພັດທະນາທີ່ສົ່ງເສີມວັດທະນະທຳທ້ອງຖິ່ນ ແລະ ຄວາມຍືນຍົງ.
ຕອນທີ່ຂ້ອຍຢູ່ວຽງຈັນ ຂ້ອຍໄດ້ພົບພໍ້ກັບຄົນຈຳນວນຫຼວງຫຼາຍທີ່ເມື່ອກ່ອນເຄີຍເປັນອາສາສະໝັກ ຫຼື ເປັນພະນັກງານຂອງສູນປາແດກ, ແລະ ທຸກຄົນກໍລ້ວນເວົ້າເຖິງສົມບັດ ໃນມຸມທີ່ອົບອຸ່ນ ແລະ ເຄົາລົບນັບຖື.
ຂ້ອຍບໍ່ຮູ້ວ່າຈະສະແດງອອກເຖິງຄວາມໂສກເສົ້າ ແລະ ຄວາມຫົດຫູ່ຂອງຂ້ອຍທີ່ມີແນວໃດ ເມື່ອໄດ້ຮັບຂ່າວການຫາຍຕົວໄປຂອງສົມບັດ; ຂ້ອຍໃນຕອນນີ້ ກໍຍັງຄົງສືບຕໍ່ຮຽນຮູ້ຈາກລາວ ແລະ ຮັບເອົາແຮງບັນດານໃຈຈາກລາວ. ເຖິງວ່າໃນຊ່ວງເວລາຫຍຸ້ງຍາກສັບສົນດັ່ງເຊັ່ນຕອນນີ້ ຂ້ອຍຮູ້ສຶກອຸ່ນໃຈທີ່ເຫັນວ່າສາກົນໄດ້ທຸ້ມແທສະແດງອອກເຖິງຄວາມຮັກ ແລະ ຄວາມເຄົາລົບນັບຖືທີ່ມີຕໍ່ສົມບັດ ແລະ ການທີ່ໄດ້ເຫັນຄົນຈຳນວນຫຼວງຫຼາຍຕ້ອງການຢາກໄດ້ຍິນຄຳຕອບຕໍ່ກັບຄຳຖາມທີ່ຕອບໄດ້ຍາກ.
ເວົ້າໄດ້ເລີຍ ຢ່າງບໍ່ລັງເລໃຈ ວ່າໂລກນີ້ເປັນຕາໜ້າຢູ່ຂື້ນຫາກມີສົມບັດອາໄສຢູ່.
——————–
ອຶງ ຄິດ ລິນ, ສິງກະໂປ (Ng Kit Lin, Singapore)
ລຸງສົມບັດແມ່ນຕົວແທນຂອງທຳມະຊາດ ແລະ ຄວາມປະສານກົມກຽວ. ລາວໄດ້ພະຍາຍາມທຳຄວາມເຂົ້າໃຈທຳມະຊາດ ແລະ ຮ່ວມມືກັບມັນເພື່ອສ້າງໃຫ້ເກີດຄວາມປະສານກົມກຽວ ແລະ ສັນຕິພາບສຳລັບມະນຸດ. ເຊິ່ງລາວກໍບໍ່ຳໄດ້ເກັບພູມປັນຍາຄວາມຮູ້ນັ້ນໄວ້ກັບຕົນເອງພຽງຜູ້ດຽວ ແຕ່ລາວໄດ້ນຳມາເປັນພາລະກິດຂອງຊີວິດຕົນເອງໃນການຖ່າຍທອດໃຫ້ກັບຄົນອື່ນໆ ຕໍ່ໆໄປ. ລຸງສົມບັດ ເຈົ້າເປັນບຸກຄົນທີ່ພິເສດອີ່ຫຼີ!
——————–
ເຊວມາລີ ກັດໂຕວ (Shalmali Guttal)
ສົມບັດ ແມ່ນໜຶ່ງໃນບັນດາໝູ່ຄົນທຳອິດທີ່ຂ້ອຍຮູ້ຈັກໃນປະເທດລາວ. ຂ້ອຍໄດ້ຮຽນຮູ້ຫຼາຍສິ່ງຫຼາຍຢ່າງ ຈາກລາວ, ໂດຍສະເພາະວິທີການເຮັດວຽກໃນສະຖານະການທີ່ທ້າທ້າຍໃນເຂດຊົນນະບົດໃນລາວ ແລະ ວິທີການທີ່ຈະມີຄວາມສຸກກັບມັນ. ວຽກງານທີ່ສ້າງສັນ ແລະ ແນວທາງໃໝ່ໆ ຂອງສົມບັດ ແລະ ສູນປາແດກກ່ຽວກັບໄວໜຸ່ມ ແລະ ເດັກນ້ອຍໄດ້ເຕີມເຕັມຊ່ອງວ່າງການພັດທະນາທີ່ສຳຄັນໃນປະເທດລາວ, ເຊິ່ງຫຼັກຖານທີ່ເປັນໝາກຜົນຂອງການເຮັດວຽກກໍແມ່ນຄວາມກ້າຫານ, ຄວາມເສຍສະຫຼະ, ແລະ ຄວາມໂດດເດັ່ນຂອງທີມງານອົງການປາແດກໃນທຸກມື້ນີ້. ໃນມື້ນີ້ ເຊິງເປັນມື້ລຳລຶກເຖິງສົມບັດ, ຂ້ອຍຂໍສະແດງຄວາມເຄົາລົບຕໍ່ທີມງານອົງການປາແດກ ແລະ ສົມບັດ ເຊິ່ງເປັນຜູ້ກໍ່ຕັ້ງອົງການປາແດກ ທີ່ເຕັມປ່ຽມດ້ວຍແຮງບັນດານໃຈ. ຂ້ອຍຫວັງວ່າໃນຊ້ວງເວລາຂອງການບຸກບືນຂອງພວກເຮົາ, ສົມບັດຈະມີຊີວິດຢູ່ ແລະ ກັບມາຫາພວກເຮົາອີກໄວໆນີ້.
——————–
ຮີຈິນ ຊອຍ, ເກົາຫຼີ (Heejin Choi, Korea)
ກ່ອນທີ່ຂ້ອຍຈະໄດ້ພົບກັບສົມບັດ ຂ້ອຍຮູ້ຈັກລາວຈາກວາລະສານແຫ່ງໜຶ່ງ ແລະ ຂ້ອຍກໍຮູ້ສຶກວ່າຄວາມສຳເລັດຂອງລາວໜ້າປະທັບໃຈຫຼາຍ ຕອນທີ່ຂ້ອຍໄດ້ພົບກັບລາວ ແລະ ຊຸຍມິງ ຄັ້ງທຳອິດ ຂ້ອຍຮູ້ສຶກວ່າລາວເປັນຄົນຖ່ອມຕົນ ບໍ່ໄດ້ຖືໂຕແຕ່ຢ່າງໃດເລີຍ. ຫຼັງຈາກນັ້ນ ເມື່ອຂ້ອຍໄດ້ຮູ້ຈັກລາວຫຼາຍຂື້ນ ຂ້ອຍມີແນວຄວາມຄິດວ່າຢາກເປັນຄືກັນກັບລາວ, ເປັນຄົນທີ່ບໍ່ມີກອບຕາຍຕົວ, ຖ່ອມຕົວ, ສະຫຼາດ, ແຕ່ມີພູມຖານ. ເປັນບຸກຄົນທີ່ໃຊ້ຊີວິດທຸ້ມເທໃຫ້ກັບສິ່ງຕົນເອງເຊື່ອຈຶ່ງຈະກາຍເປັນຄົນຄືລາວໄດ້, ຂ້ອຍຄິດວ່າ. ນອກຈາກນີ້ ຂ້ອຍຍັງຄິດວ່າ ມີໄວໜຸ່ມອີກຫຼາຍໆ ຄົນໃນປະເທດລາວ ແລະ ໃນໂລກທີ່ ມີຄວາມຈິງໃຈ ຢາກນຳຮອຍຂອງສົມບັດ ໃນດ້ານຄຸນຄ່າ ແລະ ປັດສະຍາ. ເປັນເລື່ອງທີ່ມະຫັດສະຈັນອີ່ຫຼີ ທີ່ຄົນໆ ຄົນໜຶ່ງຈະສາມາດສ້າງແຮງບັນດານໃຈໃຫ້ກັບຄົນອື່ນໆ ຢ່າງກວ້າງຂວາງ ແລະ ເລິກເຊິ່ງ. ຂ້ອຍເອງກໍຈະເຮັດທຸກວິທີທາງ ເຕີມເຕັມຊີວິດຂອງຂ້ອຍດ້ວຍຄວາມເຊື່ອ. ຂ້ອຍພຽງແຕ່ຄິດຮອດຮອຍຍິ້ມ ແລະ ສຽງຫົວຂອງເຈົ້າທີ່ສຸດ.
——————–
ເຈັກຄລີນ ຢຽວ, ອາສາສໝັກຢູ່ລາວປີ 2002 (Jacqueline Yeo, Volunteer in Laos in 2002)
ໃນຊີວິດຂອງພວກເຮົາ ເຮາພົບເຈິກັບຄົນຈຳນວນຫຼວງຫຼາຍ, ຖ້າຫາກວ່າເຮົາໂຊກດີ ເຮົາອາດຈະໄດ້ຮັບສິດທິພິເສດ ໄດ້ພົບກັບຄົນທີ່ເປັນແຮງບັນດານໃຈ ແລະ ຄົນສິດສອນພວກເຮົາເພື່ອໃຫ້ ເຮົາເປັນ ຄົນທີ່ດີກວ່າທີ່ເຮົາເປັນຢູ່ ແລະ ເອື້ອເຟື້ອເຜື່ອແຜ່ໃຫ້ຄົນອື່ນໆ ຕໍ່ໄປ. ສົມບັດເປັນຄົນດັ່ງທີ່ເວົ້າມານັ້ນ. ໂດຍບໍ່ສາມາດ ຄາດເດົາທິດທາງໄດ້ ສົມບັດໄດ້ສ້າງໃຫ້ເກີດການປ່ຽນແປງຊີວິດ ຂອງຄົນຫຼາຍໆຄົນ ເພີ່ມຂື້ນເລື້ອຍໆ, ໂດຍສະເພາະ ຊີວິດຂອງຄົນ ຮ່ວມຊາດກັບລາວ, ໃນປະເທດ ສປປ ລາວ. ແນວຄວາມຄິດ ແລະ ການກະທຳຂອງ ລາວທີ່ແນໃສ່ ປັບປຸງຊຸມຊົນໃຫ້ດີຂື້ນ ໄດ້ເຮັດໃຫ້ ປະຊາຊົນຮ່ວມຊາດມີຄວາມຮັກແພງຕໍ່ລາວ. ລາວເປັນຄົນທີ່ເຮັດ ເປັນຕົວຢ່າງ ໃຫ້ເຫັນ, ຜູ້ຄົນດັ່ງເຊັ່ນດຽວກັນກັບຂ້ອຍ ໄດ້ມີໂອກາດສຳຜັດ ແລະ ໄດ້ຮັບແຮງບັນດານໃຈໃຫ້ກາຍເປັນ ຄົນທີ່ ດີກວ່າເກົ່າ, ຈາກການໄດ້ເຫັນຄວາມອ່ອນ ນ້ອມຖ່ອມຕົນຂອງລາວ, ຄວາມມີເມດຕາ, ແລະ ຄວາມເຫັນອົກ ເຫັນໃຈຂອງລາວ. ພວກເຮົາຈົ່ງມາຊ່ວຍກັນຈົດຈຳສິ່ງທີ່ລາວໄດ້ເຮັດໄວ້ ບໍ່ໃຫ້ເລືອນຈາງຫາຍໄປ.