ສົມບັດ ສົມພອນ ນັກພັດທະນາ ສັງຄົມລາວໄດ້ຖືກລັກພາຕົວ ໄປເມື່ອ ເດືອນທັນວາປີແລ້ວນີ້ ໃນນະຄອນຫຼວງວຽງຈັນ ແຕ່ບໍ່ມີເຈົ້າໜ້າທີ່ຜູ້ໃດເລີຍ ທີ່ຢາກຈະເປີດເຜີຍເບາະ ແສວ່າລາວຫາຍຕົວໄປໃສ ຫຼື ຊາຕາກຳຂອງລາວຕອນນີ້ເປັນແນວໃດ.
ຕັ້ງແຕ່ວັນທີ 15 ເດືອນທັນວາປີທີ່ ຜ່ານມາ ທີ່ ສົມບັດ ສົມພອນ ນັກພັດທະນາສັງຄົມ ແລະ ທັງເປັນຜູ້ໄດ້ ຮັບລາງວັນແມັກໄຊໄຊໄດ້ຫາຍ ຕົວໄປ ເຮັດໃຫ້ ອຶງ ຊຸຍມິງ (Ng Shui Meng) ຜູ້ເປັນພັນລະຍາ ຕ້ອງໄດ້ໃຊ້ເວລາເກືອບທັງໝົດຂອງ ຕົນເອງໄປກັບການຮຽກຮ້ອງຂໍຄວາມເປັນທໍາ ແລະ ຊອກຫາຫົນທາງ ເພື່ອໃຫ້ໄດ້ຕົວສາມີກັບຄືນ ມາຫາ ຄອບຄົວຢ່າງປອດໄພ, ເຊິງຖືວ່າເປັນການໃຊ້ຊີວິດຕໍ່ສູ້ກັບຄວາມຍາກລຳບາກ ໃນແຕ່ລະມື້ໂດຍທີ່ຈົນເຖິງປັດຈຸບັນກໍຍັງບໍ່ໄດ້ຮັບໝາກຜົນໃດໆ ເລີຍ.
ຄັ້ງສຸດທ້າຍທີ່ເຫັນສົມບັດ ແມ່ນລາວກໍາລັງຂັບລົດຈິບໃນນະຄອນຫຼວງວຽງຈັນ ແລະຖືກຕໍາຫຼວດ ເອີ້ນໃຫ້ ຢຸດຢູ່ທີ່ປ້ອມຕຳຫຼວດ ແລະ ຫຼັງຈາກນັ້ນກໍເຫັນມີຄົນຂັບລົດກະບະມາເອົາຕົວລາວໄປ.
ແນ່ນອນຄົນໃນຄອບຄົວຂອງສົມບັດ ເຊິ່ງກໍລວມທັງແມ່ໄວອາຍຸ 85 ປີ ຕ່າງກໍມີຄວາມກັງວົນເຖິງທີ່ ສຸດຕໍ່ຊາຕາກຳຂອງສົມບັດ. ແມ່ຂອງລາວທີ່ເຖົ້າແກ່ຫຼາຍແລ້ວ ແລະ ບໍ່ຄ່ອຍມີເຫື່ອມີແຮງກໍ ຍັງຄົງລໍຖ້າຢ່າງມີຄວາມຫວັງວ່າຈະເຫັນໜ້າລູກຊາຍກົກຂອງຕົນກັບມາຫາໃນຊ່ວງບຸນປີໃໝ່ລາວ.
ເປັນເລື່ອງລຳບາກໃຈສຳລັບ ຊຸຍມິງ ທີ່ຈະຕ້ອງອະທິບາຍໃຫ້ກັບແມ່ຂອງສາມີຕົນເອງວ່າຍ້ອນຫຍັງ ສົມບັດຈຶ່ງຖືກເອົາຕົວໄປ ແລະ ຍ້ອນຫຍັງຜູ້ຄົນທີ່ມີອຳນາດຈຶ່ງປະຕິເສດບໍ່ຢາກໃຫ້ຄວາມຊ່ວຍເຫຼືອ ຊອກຫາຕົວ ຫຼື ອະທິບາຍຂໍ້ສັນນິຖານກ່ຽວກັບການຫາຍຕົວໄປຂອງສົມບັດ.
ສົມບັດເກີດໃນຄອບຄົວທຸກຍາກຢູ່ທີ່ບ້ານດອນຂຽວ, ແຂວງຄຳມ່ວນ ແລະຊ່ວງຕົ້ນຂອງຊີວິດໄດ້ ຕໍ່ສູ້ກັບ ຄວາມທຸກຍາກລຳບາກ, ຄວາມຫິວໂຫຍ, ແລະ ຄວາມບໍ່ປອດໄພ. ລາວແລະຄອບຄົວຕ້ອງໄດ້ ຊອກຫາ ບ່ອນອົບພະຍົບໃນຊ່ວງສົງຄາມອິນດູຈີນ ຊຸມປີ 1960. ສົມບັດກໍຄືກັບຄົນອື່ນໆ ທີ່ໂຊກດີ ໄດ້ຮັບໂອກາດເດີນທາງໄປຕ່າງປະເທດ ແລະ ມີຜູ້ຍື່ນໂອກາດໃຫ້ສາມາດພັກອາໃສຢູ່ຕ່າງປະເທດໄດ້ຢ່າງຖາວອນ, ແຕ່ວ່າລາວຫາກເລືອກທີ່ຈະກັບມາບ້ານເກີດເມືອງນອນຂອງລາວ ແລະ ທຸ່ມເຫື່ອເທແຮງໃຫ້ກັບການເຮັດວຽກເພື່ອຊ່ວຍ ເຫຼືອປະເທດຂອງຕົນເອງ ແລະ ເພື່ອນຮ່ວມຊາດ ໃຫ້ມີການພັດທະນາທີ່ດີຂື້ນ.
ສົມບັດໄດ້ຮັບການສຶກສາທີ່ດີໃນປະເທດສະຫະລັດອາເມລິກາ ແລະ ແທນທີ່ລາວຈະຮັບເອົາໂອກາດ ທີ່ຈະ ໄດ້ໃຊ້ຊີວິດທີ່ສຸກສະບາຍ ແລະ ທັນສະໄໝໃນປະເທດຕະເວັນຕົກ ແຕ່ລາວຫາກເລືອກ ເສັ້ນທາງກົງກັນ ຂ້າມ ກໍຄື ການອຸທິດຕົນເຮັດວຽກເພື່ອຍົກລະດັບຄຸນນະພາບຊີວິດຂອງປະຊາຊົນ ຜູ້ທຸກຍາກໃນປະເທດ ຂອງຕົນເອງ. ລາວໄດ້ເຮັດວຽກຢ່າງບໍ່ອິດບໍ່ເມື່ອຍໃນການສົ່ງເສີມ ການພັດທະນາແບບຍືນຍົງ ແລະ ກໍໄດ້ຮັບລາງວັນ ຮາມອນ ແມັກໄຊໄຊ (Ramon Magsaysay Award) ສາຂາຜູ້ນຳພາຊຸມຊົນ ໃນປີ 2005.
ຜູ້ທີ່ມີອຳນາດຄວນໃຫ້ຄວາມເຄົາລົບ ແລະ ສະໜັບສະໜຸນວຽກງານຂອງສົມບັດ ແຕ່ວ່າກົງກັນຂ້າມ ລາວບໍ່ ໄດ້ຮັບການຮັບຮູ້ ຫຼື ຍ້ອງຍໍຈາກທາງການໃນປະເທດຂອງຕົນເອງແຕ່ຢ່າງໃດເລີຍ.
ຫຼາຍຄົນໃນລາວເຊື່ອວ່າສົມບັດຖືກເອົາຕົວໄປໂດຍເຈົ້າໜ້າທີ່ຜູ້ທີ່ສໍ້ລາດບັງຫຼວງ ຍ້ອນສາເຫດວ່າລາວຕໍ່ຕ້ານການສ້າງເຂື່ອນຂະໜາດໃຫຍ່ກໍຄື ເຂື່ອນໄຊຍະບູລີ, ແຕ່ວ່າ ຊຸຍມິງ ຕອບວ່າສົມບັດບໍ່ມີສ່ວນກ່ຽວຂ້ອງໃດໆເລີຍກັບເລື່ອງເຂື່ອນດັ່ງກ່າວ.
ຄົນຈຳນວນໜຶ່ງສົງໃສວ່າບັນຫາອາດຈະມາຈາກກອງປະຊຸມພາກປະຊາຊົນ ເອເຊຍ-ເອີຣົບ (AEPF) ທີ່ສົມບັດໄດ້ປະກອບສ່ວນຊ່ວຍເຫຼືອການຈັດຕັ້ງກອງປະຊຸມດັ່ງກ່າວ. ມີການສັນນິຖານວ່າກອງປະຊຸມເພື່ອຄົນທຸກຍາກດັ່ງກ່າວແມ່ນຖືກອອກແບບມາເພື່ອຂາຍໜ້າເຈົ້າໜ້າທີ່ຂອງລາວໃນເລື່ອງທິດທາງການພັດທະນາ ແລະ ເຈົ້າໜ້າທີ່ກໍໃຫ້ຄວາມສຳຄັນກັບເລື່ອງນີ້.
ຊຸຍມິງໄດ້ປະຕິເສດກ່ຽວກັບທິດສະດີດັ່ງກ່າວ ໂດຍຕອບວ່າກຸ່ມພາກປະຊາສັງຄົມເປັນຜູ້ຈັດກອງປະຊຸມດັ່ງກ່າວໂດຍການຮ່ວມມືກັນກັບກະຊວງການຕ່າງປະເທດ. ສົມບັດເປັນພຽງສ່ວນໜຶ່ງຂອງທີມງານຜູ້ຈັດກອງປະຊຸມ ແລະ ບໍ່ໄດ້ມີສ່ວນກ່ຽວຂ້ອງໃນການນຳພາກຸ່ມສົນທະນາຫົວຂໍ້ໃດໆ ເລີຍໃນກອງປະຊຸມ ດັ່ງນັ້ນຈຶ່ງບໍ່ມີທາງທີ່ບົດບາດຂອງສົມບັດ ຫຼື ຕົວສົມບັດເອງຈະເປັນການຂາຍໜ້າບຸກຄົນທີ່ມີອຳນາດ. ຊຸຍມິງໄດ້ກ່າວເພິ່ມເຕິມວ່າ ຄວາມຈິງແລ້ວ ກອງປະຊຸມໄດ້ເປັນການຊ່ວຍຜັກດັນໃຫ້ລັດຖະບານລາວມີບົດບາດໃນລະດັບສາກົນຫຼາຍຂື້ນ
ດ້ວຍເຫດຜົນທີ່ວ່າ ການອຸທິດຕົນໃຫ້ແກ່ປະເທດຊາດຂອງຂອງສົມບັດໄດ້ປາກົດຜົນເຫັນເປັນຮູບປະທຳຢ່າງຫຼວງຫຼາຍ ຊຸຍມິງແລະຄອບຄົວຈຶ່ງມີຄວາມຄາດຫວັງວ່າຈະໄດ້ຮັບຊ່ວຍເຫຼືອຢ່າງເປັນທຳຈາກເຈົ້າໜ້າທີ່ໃນການຊອກຫາຕົວສົມບັດ. ເຖິງຢ່າງໃດກໍຕາມ ຜູ້ຄົນທີ່ຢູ່ໃນຕຳແໜ່ງທີ່ຈະຊ່ວຍສືບຫາສົມບັດກໍຍັງບໍ່ເຫັນມີການດຳເນີນການແນວໃດເລີຍ. ຜູ້ຄົນບາງຈຳນວນທີ່ເຄີຍເປັນເພື່ອນມິດກໍໄດ້ສະແດງຄວາມເຫັນອົກເຫັນໃຈ ແລະເປັນກັງວົນ ແຕ່ກໍເລືອກທີ່ຈະຢູ່ຫ່າງໆ ບໍ່ເຂົ້າມາກ່ຽວຂ້ອງກັບເລື່ອງນີ້.
ຊຸຍມິງເປັນຄົນສັນຊາດສິງກະໂປ ແຕ່ໄດ້ອາໃສຢູ່ໃນປະເທດລາວເປັນໄລຍະເວລາຫຼາຍກວ່າ 30 ປີແລ້ວ. ລາວສາມາດເວົ້າພາສາລາວໄດ້ເປັນຢ່າງຄ່ອງແຄ້ວ ແລະ ຮູ້ຈັກຄົນລາວຫຼາຍຄົນທີ່ມີບົດບາດໃນສັງຄົມລາວ ແຕ່ກໍຍັງບໍ່ມີໃຜຍື່ນມືມາໃຫ້ຄວາມຊ່ວຍເຫຼືອແກ່ລາວແຕ່ຢ່າງໃດເລີຍ. ຫຼາຍຄົນຫຼີກລ່ຽງທີ່ຈະພົບກັບຊຸຍມິງໃນທີ່ສາທາລະນະ ອາດຈະຍ້ອນຄວາມຢ້ານກົວວ່າລາວຈະຂໍຄວາມຊ່ວຍເຫຼືອໃນການຊອກຫາຕົວສົມບັດ.
ຄົນລາວມີຊື່ສຽງໃນດ້ານການເປັນຄົນນອບນ້ອມຖ່ອມຕົນ ແລະ ມີຈິດໃຈເມດຕາໂດຍທຳມະຊາດ ແຕ່ວ່າເປັນເລື່ອງໜ້າອາຍທີ່ທາງຊຸຍມິງ ແລະ ຄອບຄົວຕ້ອງຖືກປະປ່ອຍໃຫ້ສືບຫາຕົວສົມບັດດ້ວຍຕົວພວກເຂົາເອງ. ຫາກວ່າມີອີກຫຼາຍຄົນສະແດງເຈດຈຳນົງທີ່ຈະເຂົ້າຮ່ວມໃນການສືບຫາຕົວສົມບັດ ມັນກໍຈະຊ່ວຍຜັກດັນເຈົ້າໜ້າທີ່ຫຼາຍຂື້ນອີກໃນຊ່ວຍຄົ້ນຫາຂໍ້ເທັດຈິງກ່ຽວກັບການຫາຍຕົວໄປຂອງສົມບັດ ວ່າລາວຖືກເອົາຕົວໄປໄວ້ໃສ ແລະ ດ້ວຍຄວາມຫວັງສູງສຸດວ່າລາວຈະກັບມາດ້ວຍຄວາມປອດ.